لازم نتعلم السواقة

 بدأت حملتي الخاصة تحت شعار اريد سيارة منذ بداية مرحلة الدراسة الثانوية , طبعا في المرحلة الابتدائية و الاعدادية كانت مجرد طموح , و لكن في المرحلة الثانوية تحولت لمطلب مشروع .

و طبعا بابا كان يساير فيا بقدر الامكان لانه يخاف عليا من السواقة و لازال فكان كل مرة يقول لي مرة , ففي المرحلة الثانوية قال لي بعد ما تاخذي الشهادة الثانوية حاضر نشريها لك و طبعا خديت الشهادة الثانوية و لم اتحصل عليها , و بعد هكي المرحلة الجامعية و نفس الموضوع كملي الجامعة و نشريها و تمت الجامعة و مشريتهاش.

المهم في نهاية السنة الاولى في مرحلة الدراسات العليا قررت ان ابدأ بخطوات عملية لتحقيق مسألة الاستقلال الخاص بالتنقل و تنفيذ مطالبي و و استجاب النظام المتمثل في بابا لمطالب الشعب المتمثل في شخصي و قام باستخرج الاوراق المطلوبة للبدء في التدريب على القيادة و سجلت في مدرسة تعليم القيادة , و هنا بدأت اكتشف اني جبانه مع احترامي لنفسي طبعا.

اول مرة تدربت عند ابلة مدام اشتركت عندها و بدأت معها الحصص على سيارة عادية مش توماتيك , المهم هيا اللي دربتني مأساة وجودية بروحها فهيا طول الوقت تهدرز في الفاضي و المليان , و المشكلة الثانية انها تجيب معاها قريب 3 بنات ثانيات على اساس كل وحدة تاخذ ساعتها و شوف الدوشة و الكلام الفاضي و التفتفيت , و زيد على هذا زايد وين ادرب فينا ؟ في السريع و في النجلية الدنيا خلي مخلي معناها من الاخير مفيش اي حاجات حرفيه بتعلمها لك , و كله كوم و لما تتكلم على انها كل اللي دربتهم طلعوا واااااااااااااااو في السواقة كوم ثاني , واللي يحرق الاعصاب اكثر انها هي المتحكمة فعليا في السيارة  معناها تخليك ترضي نفسيا ب على اساس تسوقي اما هيا اللي شاده البنزينه و الفرينو و كل شي , و اللي يزيد الطين بله هو المسجل اللي تقوي فيه على اعلى صوته مع مشاركة الانسات معاها ,  توا بلهي كيف بندرب في هالجو الخانق ترا , و طبعا من الحاجات اللي تكسر الكرايم انه في ساعة التدريب الخاصة بيك تلقاها تبي تمر على حوش صاحبتها او محل فلاني ابصر شن بتشري منه او وحدة من البنات اللي يدربوا معاها بتلاقي صاحبها و تنزل و انتي استنيها و هذا كله ماشي من وقتك , حاجة تقهر و تجلط , و المفاجأة الحقيقة هيا طريقة كلامها تقول راجل مش مراة و يا ويله كان حد اجتاز سيارتها حي عليه حي تاكله ماكله زي التشيبسي هههههههههههههه , و طبعا انا طوال فترة تدريبي معاها على اعصابي و متوترة , المدام هذي  ادربت معاها قريب شهرين و اخر حلقة طلعت زي ما خشيت معناها لا تعلمت و لا هم يحزنون على قولة ماما زكار في فم جامع .

بعد ما وقفت من المدام هيا مشيت دورت مدرسة ثانية و مشيتلهم و دفعت الاشتراك و قالوا لي الابلة تجي بكرا و نتصلوا بيك و هكي قلت تمام  , المهم اتصلوا بيا و مشيت ثاني يوم لقيت في المدرسة هيا المعلمة سلمنا و تعارفنا و طلعنا على اساس للسيارة , المهم اول ما قلت باسم الله ولعنا السيارة و يطلعوا لي صغار ابصر من وين و شديت فرينو , مش هني المشكلة تخيلوا المخلوقة اللي المفروض الابلة ترفع صوتها , و انا كله كوم و رفع الصوت منتفقش معاه بكل , خليتها تكمل الموشح اللي بداته على اساس ابلة حرفة و تحساب بتمشيه عليه , بعد ما كملت حكاياتها و السيارة مدرسة نزلت منها و قلتلها هذا فراق بيني و بينك و مش اني اللي تقدري ترفعي صوتك عليا و نزلت للمدرسة بنستنى بابا لين يجيني يروح بيا , المهم نزلت تعتذر و تتسخف قلتلها سامحيني منقدرش ندرب معاك... نهاية مش حلوة

و بعدها بمدة رجعت لحكاية البحث عن مدرسة لتعليمي القيادة , و المرة هيا  قررت انه خلاص المفروض نجرب تدريب استاذ بدل ابله , مشيت لمدرسة التدريب و قلت لهم نبي شاب يعلمني , و لقينا الاستاذ و دفعت الاشتراك و بديت الحصة الاولى تمام التدريب في وسط البلاد معناها في الزحمة يا سلام يا حلولي طبعا ندرب على سيارة عادية مش توماتيك حتى المرة هيا , المهم قعدت ندرب معاه قريب شهرين قبل بداية الاحداث في ليبيا و على كلا الحق ينقال انه مدرب باهي و ان المشكلة عندي اني جبانه جدا لاني نخاف من السيارات اللي تجري , و اللي يستخدموا في المنبه على اساس يبوك تستعجلي ,و نرتعب من اللي على اساس بيجتازوني , و نرعش من وسط قلبي من اللي يديروا فرينوا سيك حتى لو كان بعيد عليا هلبه هلبات , و يزعجني جدا الناس اللي يقصوا بطريقة غبية , و نفقد تركيزي لما اي حد يتكلم و انا نسوق ,المهم الخلاصة اني مأساة تراجيدية جدا و خاصة لما نروح من حصة التدريب و اني حاسه روحي متعلمتش شي انروح دمي محروق و اعصابي مشدودة تقول ميت لي ميت .

و طبعا يسألني سائل فوتي الموضوع و تجاوزيه و خلاص مش لازم تتعلمي و فوتي السواقة ؟

اكيد لا ,لازم نتعلم لا يأس مع الحياة و خاصة اني بديت انفكر اني نوعا ما نضجت عمريا و اني المفروض نبدا نعتمد على نفسي على الاقل في قضاء مشاويري من الجامعة للبيت او العمل للبيت او للذهاب للمكتبة وغيرها من مشاوير بسيطة خاصة  .

المهم قررت بعد ما تمت الاحداث في ليبيا اني نشري سيارة و هذا اللي صار شريتها و درستها .

طبعا توا بدت حكاية اني بنبدا التدريب من جديد على نوع توماتيك , المهم سجلت في مدرسة و بديت معاها الابلة , ليا معاها حاليا قريب شهر و نص كالعادة لازالت عندي اشكالية في الحسابات و استعمال المرايات و نخاف نسوق في الزحمة و ما الى ذلك و بديت نروح من التدريب متوترة جدا , طلعت انا و بابا مرتين في سيارتي , المرة الاولى اول ما ولعت السيارة و بنزلها من على المرشابيدي قريب دخلتها في الحيط اللي قدامي بس تداركت الامر اخر لحظة هههههههه و وترت بابا معاي يا ناري  و كانت هذيكا الدورة الصغيرونة مليانه بالتوتر و شد الاعصاب 

و المرة الثانية اللي هيا اليوم طلعت انا و بابا من الصبح في سيارتي باعتبار ان الطريق رح تكون فاضية يوم الجمعة و استمتعت شويا بس اخر حلقة قال لي درسيها في القاراج و الحمد لله جت بسيطة و اني كيف بندخلها من الكنشيلو خبشتها من الحيط اوف رعشه بس بسيطة عموما .

طبعا انفكر اني بنغير المدربة المرة  هيا و بنمشي اندور راجل يعلمني السواقة و عارفة ان الاشكالية عندي و هي الخوف من كل شي في السواقة لكن يلا ما علينا انقولوا من المدربة و يمكن نلقى مدرب يخليني شوماخر في السواقة من يعرف...

طبعا سامحوني كترت التفتفيت اليوم بس لاني متعفلقه من اني مازال معرفتش نتعلم هالسواقة الغبرة و اللي يزيد يحرق لي اعصابي ماما و اختي و خوتي و كل اللي نعرفهم يسألوا فيا شن صار فيك تعلمتي و الا مازال؟ لما نقول مازال , يحسسوني اني اغبى مخلوق على الارض غريبة التوماتيك مفيش اسهل منها راهو 

محدش حاس بلي حاسه بيه ما تحس النار الا العافسه فيها

دمتم بسلام