كلام نبي نقوله " باللهجة الليبية "

كلما تكلم شخص ما عن الثورة او تصرفات الثوار و انتقد سلوكا ما لانه خطأ قال له الجميع  هذا مش وقته ليبيا في مرحلة انتقالية او قاله انت طابور خامس والا الباين قاعد تبي القذافي.

من الخطا ان تتجاهل وجود الخطا و الادعاء انه غير موجود اللي صاير في ليبيا الان ان الحريات تنتهك  تحت مسمى دم الشهداء و كل واحد منصب نفسه المتحدث الرسمي باسم الشهداء و سيناريو 69 يتكرر بطريقة درماتيكية 

قولولي كيف ؟ 

طبعا لما يصير حكم العسكر هو المسيطر معناها في مشكلة لانه مثلا اقامة عرض ازياء زي اللي صار اول امس مجرد تصرف غير محسوب او محسوب بغباء على كلا و بالرغم من عدم تأييدي للعرض و لا وقته بس انا منقدرش نأيد ان يتم مطاوقة المكان اللي يجري فيه العرض من قبل كتيبة السويحلي سوق الجمعة  او ائتلاف 17 فبراير و القبض على منظمي هذا العرض وين القانون ؟؟؟ و شن التهمة ؟؟ و باي حق تقبض على شخص ؟؟ بتقول لي وفقا للشريعة الاسلامية و الكلام هذا انقولك اوكي لكن هالشريعة مازال مصدرش الدستور اللي يقول ان القران او الشريعة هي مصدر من مصادر القانون و مخالفتها يترتب عليها الجزاء , معناها المنطقي ان المسلحين هما اللي حطوا من روسهم القانون و نفذوه من روسهم من غير اي اجراء قانوني صحيح , و بالتالي تم الاعتداء على حقوق الاشخاص اللي قاموا بتنظيم العرض عن طريق الاعتداء على حقهم في حرية التنقل و تم اقتيادهم من قبل مسلحين بدون سند قانوني . 

تمام , لكن السؤال اللي يطرح الان : علاش الناس طلبوا من الائتلاف او من المجلس العسكري التدخل ؟ 

زمان كنا نتوقعوا ان اللجوء للقمع بمارس من بعض الاشخاص لان الحق في الاعتراض و ممارسة الحق في التظاهر ممنوع , لكن توا بامكانك ان تتظاهر ضد اي شي وقفت على هذي و لقيتوا انفسكم عاجزين و رجعتوا للسلوك القديم بتاع التدخل المسلح هو الحل طبعا الشعب بتصرفه " الساذج " هذا اعطي الاذن لهذه الجماعة ان يستعملوا السلاح لانتهاك حقوق الاخرين بدون رادع و بطلب منه و كأنهم يطالبوا بهيئة الامر بالمعروف و النهي عن المنكر هههههههههههه . 

المهم المضحك في الامر ان عن طريق ما رأيت من حوارت عن طريق الفيس بوك اغلب الاشخاص يصفقوا و يكبروا على هذا التصرف و كأنه بطولة بالرغم من انه عار على جبين الثورة مصادرة الحق بقوة السلاح من قبل من ثاروا من اجل الحقوق . 

و ايضا من الامور اللي لازم نتكلم عليها مسألة هدم الاضرحة اللي كانت المدة اللي فاتت من قبل بعض السلفيين ضد الصوفيين , طبعا موقفي تجاه الموضوع هذا لا يختلف عن سابقة انا يعني لست ممن يتبركون بالاضرحة و لست من زوارها و لكني لن اصادر حق الاخرين في زياراتها ايا كان هدفهم , كما ان الضريح يعتبر جزء لا يتجزء من تراث اي مدينة و من الخطأ طمسه , و لكن كل ذلك ساتجاوزه لاركز على النقطة الاكثر ازعاجا بالنسبة لي هو من اعطي الحق لهؤلاء المسلحين ان يأتوا و يحطموا ضريحا او ينبشوا قبرا و ينتهكوا حرمة ميت بدون اي اذن قانوني او حكم قضائي الاذن الوحيد انهم لديهم سلاح و ينصبون انفسهم اوصياء على الشعب الليبي في تنفيذ دينه .... طبعا التصرف هذا ايضا سيمر بدون اي محاسبة و لا مسألة بالعكس المجلس يقوللهم يا سويدي تربحوا وقفوا يترجي فيهم و هما مطنشين السلاح في يديهم من قدهم . و نفس ردت فهل الجمهور على الانترنت يكبروا و فرحانين و مفيش حد قال من عطاهم الحق هما ينصبوا روحهم اوصياء علينا ؟

و لنتكلموا عن مسألة اخرى مزعجة و هيا حكاية اللي صار في بوسليم , طبعا اللي صار في بوسليم الايام اللي فاتوا انه مجموعة شباب يوم الجمعة قرروا انهم يأيدوا القذافي و طلعوا رافعين العلم الاخضر و يبدوا انه هناك من ضرب بالرصاص و صارت مناوشات و الله اعلم مع العلم ان تصرفهم من وجهة نظري قمة السخافة لانه ارهب الناس و خلق زعزعة للامن و مش وقته و المفترض بيهم يحاولوا يساهموا في بناء ليبيا مش تدميرها و خلق حالة من اللا امن ,  على كلا الاشكالية اللي عندي حاليا هيا قانونية و زعجتني جدا , الاشكالية ان تم مطاوقة الحي بالاسلحة الثقيلة و كل الكتائب تمركزوا غادي و ضرب الرصاص و الميم طاء و قصة حزينة بالرغم من ان عدد اللي داروا الضجة شويتونا باهي علاش هالدوشة كلها و طبعا مننسوش المداهمات للمنازل بحجة مناصرة القذافي و حيازة صوره اصبحت تعد جريمة يحاسب عليها القانون العسكري الجديد ذكرني بالسيناريوهات اللي كنت اتوقعها بعد انقلاب 96 لما كل واحد يبي الملك نهاره احرف على راسه نفس الشي و عندي صديقة تسكن في بوسليم اتصلت بيا راعشه يا ناري قالت لي ضرب الرصاص و المداهمات و انه في احد الشقق لجيرانهم الثوار ضربوها بالار بي جي تخيل و زيد عليه يا زايد بالسيارة الكبيرة يدوروا في المنطقة عندهم و بقولولهم وين الطحالب وين اطلعوا يا طحالب ؟ معناها نفس تصرف الكتائب لما تدور في الاحياء ويقولوا وين الجرذان ... و تجي على الانترنت تلقي اللي يقولك المفروض تمتسح بوسليم بالجراد و اللي يقولك هما خونة ... اشكالية ان يكون كل ليبي مستبد بطريقته البدائية .

و طبعا الشي بالشي يذكر بالامس صباحا اقرأ ان تقرير للامم المتحدة يقول ان في حوالي 7000 سجين يمارس عليهم التعذيب في السجون بتهمة موالاة النظام السابق او كان من ازلام النظام .مع العلم ان هناك من مات تحت التعذيب... الخ بما معناه هما الاشخاص لم يعرضوا على قضاء و لا محاكمة عادلة و لا شي ... اوكي معناها لازلنا ننتهك حقوق الاخرين بحجة الشرعية الثورية . 

طبعا في الختام ساقول كلمات ارجوا ن يجدوا مكانا لدى اخوتي الليبين و اخواتي الليبيات من الضروري ان نوسع دائرة الوعي بالحقوق و الحريات , لابد ان نفهم الاخرين دور مؤسسات المجتمع المدني , يجب ان لا يمر اي اعتداء في صمت فالسكوت في البداية يعتبر قبولا و مع الوقت يتحول الى عرف حتى يتحول الى قانون .... لابد ان ننبه للخطأ لان السكوت عليه ظلم لانفسنا اولا و للاجيال القادمة لاحقا